Aðstaða hestafræðideildar

Athafnasvæði hestafræðideildar. Heimild: www.loftmyndir.is

Stærsta byggingin er Brúnastaðir. Í húsinu eru 189 eins hests stíur, og hluti þeirra hentar fyrir stóðhesta. Það er fyrst og fremst nýtt undir nemendahesta og hesta í eigu skólans, skólahestana. Í suðurenda Brúnastaða er 800 fermetra reiðhöll, Brúnastaðahöllin. Brúnastaðir voru vígðir árið 2007 og þeir eru reknir af sérstöku eignarhaldsfélagi, Hesthólum. 

Á háannatímum í verklegri kennslu dugar þetta hesthúsrými ekki til og í „Gamla hesthúsinu“ er pláss fyrir 20-30 hross til viðbótar. Áföst því hesthúsi er Skólahöllin, önnur 800 fermetra reiðhöll, sú fyrsta sem reist var á Hólum. Í tengibyggingu eru m.a. járningaaðstaða og lítil kennslustofa.

Þriðja reiðhöllin, Þráarhöllin, er langstærst (1545 fermetrar), og skartar hún m.a. áhorfendastúku.

Bakka, húsnæði því sem áður hýsti loðdýrabú Bændaskólans á Hólum, hefur verið breytt til annarra nota. Verkstæði skólans og aðstaða staðarumsjónarmanns eru í Efri-Bakka (refahúsinu) en í Neðri-Bakka (minkahúsinu) eru m.a. nokkrar hesthússtíur sem einkum eru nýttar í tengslum við fóðurrannsóknir. Í tengibyggingu er aðstaða til dýralækninga, þar sem hægt er að framkvæma flestar skoðanir og aðgerðir á hestum.

Aðalreiðvöllur skólans er fyrir framan Þráarhöllina.

Fjárhúsum Bændaskólans hefur einnig verið breytt til takts við nýja tíma. „Nýju“ fjárhúsin  gegna nú hlutverki starfsmannahesthúss og bera nafnið Skeiðmelur.

Þú ert að nota: brimir.rhi.hi.is