Brautskráning að hausti

Í dag fór fram brautskráning  frá Háskólanum á Hólum,  við hátíðlega athöfn í Hóladómkirkju. Venju samkvæmt hófst dagskráin með ávarpi rektors, Erlu Bjarkar Örnólfsdóttur en síðan sté formaður fjarveitinganefndar Alþingis og fyrsti þingmaður Norðvesturkjördæmis, Haraldur Benediktsson, í pontu. 
 
Deildarstjórar hinna þriggja deilda Háskólans á Hólum brautskráðu síðan sína nemendur, hver á fætur öðrum. Alls brautskráðust 15 nemendur í dag, allir af grunnnámsstigi háskólans. Þrír með diplómu í viðburðastjórnun, þrír með BA-gráðu í ferðamálafræði, þrír með diplómu í reiðmennsku og reiðkennslu og sex í fiskeldisfræði. Þar með eru brautskráningar frá Háskólanum á Hólum í ár orðnar alls 74.
 
Síðastur á mælendaskrá var nýútskrifaður ferðamálafræðingur, Erla Sighvatsdóttir, sem talaði fyrir hönd brautskráningarhópsins. Athöfninni stýrði Helgi Thorarensen, prófessorí fiskeldisfræði og þau Íris Olga Lúðvíksdóttir og Rögnvaldur Valbergsson sáu um tónlistarflutning.
 
Að athöfn lokinni var viðstöddum boðið til veglegs kaffisamsætis, sem Ferðaþjónustan á Hólum annaðist, á veitingastaðnum Undir Byrðunni.
 
Starfsmenn skólans þakka gestum fyrir komuna  og óska þeim góðrar heimferðar. Nýbrautskráðum fylgja hamingjuóskir, um leið og minnt er á að þeir eru ávallt velkomnir aftur heim að Hólum.
 
6. október 2017.
 
Brautskráning okt. 2017
Þú ert að nota: brimir.rhi.hi.is