Gönguleiðir og áningarstaðir - upptaka af fyrirlestri

Miðvikudaginn 21. nóv. sl., kom Davíð Örn Stefánsson, verkefnisstjóri Landgræðslunnar, heim að Hólum og flutti erindið Gönguleiðir og áningarstaðir. Erindið var hluti af fyrirlestraröð Ferðamáladeildar Háskólans á Hólum sem gengur undir heitinu Vísindi og grautur, og var ánægjulegt að sjá hve margir gestir lögðu leið sína hingað heimeftir til að hlýða á Davíð Örn og taka þátt í umræðum á eftir.
 
Fyrirlesturinn var tekinn upp, og hér má nálgast upptökuna.
 
Ágrip erindis
Aukin fagþekking við hönnun og gerð sjálfbærra gönguleiða og áningarstaða
Ferðamennska og útivist hefur vaxið mikið á síðustu árum hérlendis. Jafnframt hefur álag aukist á ferðamannastaði og útivistarsvæði, oft með tilheyrandi landskemmdum. Víða hefur verið brugðist við með uppbyggingu gönguleiða og áningarstaða og varið til þess háum fjárhæðum með mismunandi árangri.
Sá hluti lands sem stendur utan þjóðgarða og verndaðra svæða er sérstaklega berskjaldaður fyrir landskemmdum. Ábyrgðaraðilar hafa oft úr litlu fjármagni að spila til verndaraðgerða og víða er takmörkuð þekking á viðfangsefninu. Mikilvægt er að efla fagþekkingu á hönnun og gerð sjálfbærra ferðamannastaða og útivistarsvæða meðal sveitarfélaga, landeigenda og annarra umsjónaraðila lands, til verndar náttúru og til að  tryggja ábyrga ráðstöfun fjármuna.
Í erindinu var fjallað um grundvallaratriði við hönnun og gerð göngustíga og áningarstaða í náttúru Íslands. Sagt var frá ASCENT verkefni Landgræðslunnar (Apply Skills and Conserve our Environment with New Tools) og samstarfsaðila hennar. Verkefnið felur í sér þróun aðferða við að auka fagþekkingu þeirra sem fást við umsjá ferðamannastaða og útivistarsvæða.
Davíð Arnar Stefánsson, verkefnisstjóri Landgræðslunnar.
 
Myndin er frá Dimmuborgum, svæði í umsjá Landgræðslunnar.
 
Frá Dimmuborgum
 
Þú ert að nota: brimir.rhi.hi.is