Rannsókn á viðburðinum Landsmóti hestamanna

Fulltrúar Landsmóts hestamanna, Háskólans á Hólum og Rannsóknamiðstöðvar ferðamála undirrituðu þann 2. júlí samkomulag um rannsókn á Landsmóti 2018 sem heildstæðum viðburði.
 
Rannsóknin er unnin í framhaldi af rannsókn Ferðamáladeildar Háskólans á Hólum á Landsmóti hestamanna árið 2016 á Hólum. Markmið hennar er að auka þekkingu á viðburðahaldi og viðburðastjórnun, einkum á sviði hestamennsku, styrkja tengslanet rannsakenda á sviði viðburðastjórnunar, auka þekkingu á Landsmóti hestamanna og efla rannsóknir í viðburðastjórnun við Háskólann á Hólum og Rannsóknamiðstöð ferðamála.
 
Landsmót hestamanna ehf. styður við rannsóknarstarfið, s.s. með því að veita rannsóknarhópnum frían aðgang að mótssvæðinu í Víðidal og aðgang að gögnum, auk þess að liðka fyrir rannsóknum með öðrum hætti eftir því sem kostur er.
 
Á meðfylgjandi mynd, sem tekin var við undirritun samkomulagsins í Víðidalnum, eru þau Guðrún Þóra Gunnarsdóttir, forstöðumaður RMF, Ingibjörg Sigurðardóttir lektor við Háskólann á Hólum og Áskell Heiðar Ásgeirsson, framkvæmdastjóri Landsmóts 2018.
Þú ert að nota: brimir.rhi.hi.is