Reiðsýning brautskráningarnema | Háskólinn á Hólum

Reiðsýning brautskráningarnema

Hin árlega reiðsýning Hólanema fór fram í dag, laugardaginn 18. maí. Þessi sýning hefur skapað sér sess sem hápunktur lokadagskrár hjá BS-nemum í reiðmennsku og reiðkennslu, sem nú hafa lokið öllum sínum prófum.
 
Nemendur sýndu í verki margt af því sem þeir hafa lært í reiðmennsku í þriggja ára námi sínu hér við skólann. Mette Mannseth, yfirreiðkennari skólans, lýsti því sem fram fór jafnóðum fyrir áhorfendum sem voru fjölmargir.
 
Í lok sýningar færði Súsanna Sand Ólafsdóttir, formaður FT, nemana í hina bláu einkennisjakka, með rauða kraganum. Hún veitti auk þess viðurkenningu fyrir besta árangur á lokaprófi í reiðmennsku og var það að þessu sinni Árný Oddbjörg Oddsdóttir sem vann til hennar. Hún hlaut einnig Morgunblaðshnakkinn, sem veittur er fyrir besta heildarárangur í öllum reiðmennskugreinum í BS-námi í reiðmennsku og reiðkennslu.
 
Við munum birta myndir frá sýningunni á Facebook-síðu skólans eftir helgina.
 
Sýningin var haldin á reiðvelli Hólaskóla og var felld inn í dagskrá hestaíþróttamóts UMSS og Skagfirðings, sem haldið er heima á Hólum um helgina.
 
Að sýningunni lokinni riðu hinir bláklæddu knapar til hefðbundinnar myndatöku við Hóladómkirku og að því búnu var þeim og fjölskyldum þeirra boðið til kaffisamsætis á Undir Byrðunni. Formleg brautskráning þessara nemenda og annarra fer síðan fram við hátíðlega athöfn í Hóladómkirkju, föstudaginn 7. juní nk.
 
Um leið og við óskum þessum glæsilega hópi til hamingju með árangurinn, minnum við á að hver vegur að heiman er vegurinn heim - að Hólum.
Þú ert að nota: brimir.rhi.hi.is