hvar? - aðstaða - íbúðarhúsnæði - aðrar stofnanir - Hólarannsóknin

Hjaltadalur gengur til suðausturs inn í hinn mikla fjallgarð, sem liggur milli Skagafjarðar og Eyjafjarðar og er oft nefndur Tröllaskagi. Dalurinn er um 30 km að lengd, umlukinn 1000 -1200 m háum fjöllum með skörðum og þverdölum. Smájöklar eru víða í dalbotninum. Dalurinn er fremur veðursæll og vel gróinn. Bærinn Hólar er nálægt miðjum Hjaltadal að austan. Hann stendur í hólaþyrpingu, sem er framhlaup úr Hólabyrðu, einu tígulegasta og hæsta fjallinu á þessum slóðum (1244 m.y.s.).

Frá Hólum eru 32 km til Sauðárkróks, stærsta þéttbýlis í Skagafirði. Milli Hóla og Reykjavíkur eru 379 km og 133 km milli Akureyrar og Hóla. Skagafjörður er landbúnaðarhérað, frægt fyrir hrossarækt og hestamennsku. Jafnframt er þar stundaður fjölbreyttur landbúnaður, iðnaður og sjávarútvegur, auk margs konar þjónustu.