Ábyrg stjórnun viðburða og ferðaþjónustu

BA nám í ábyrgri stjórnun viðburða og ferðaþjónustu menntar fólk til forystu í viðburðahaldi og stjórnun ferðaþjónustu. Námið hentar öllum þeim sem vilja gegna leiðandi hlutverki í skipulagningu og framkvæmd viðburða (s.s. ráðstefnur, hvataferðir, tónlistarviðburðir, íþróttaviðburðir, matarviðburðir, sýningar af ýmsum toga, menningarviðburðir og skapandi greinar, lífsviðburðir, alþjóðlegir viðburðir ofl).

Í náminu mynda nemendur tengslanet sem nýtist í leik og starfi alla ævi. Nemendur öðlast víðtæka þekkingu á viðburðahaldi og ferðaþjónustu þar sem efnahagsleg, félagsleg og umhverfisleg sjálfbærni og ábyrgð er höfð að leiðarljósi. Í náminu öðlast nemendur reynslu og færni í gegnum fjölmörg hagnýt verkefni sem og verknám á 1. ári, hagnýtt verkefni á 2. ári og BA lokaverkefni á 3. Ári.

Námið er 180 ECTS einingar og er grunnur fyrir framhaldsnám t.d. á sviði viðburða- eða ferðamálafræða. Námið skiptist í tvær diplómur, A. Diplóma í viðburðastjórnun og B. Diplóma í sjálfbærni viðburða, sem hvora um sig er hægt að taka stakar án frekara náms eða hvora á eftir annarri (sama í hvaða röð) og lokaár þar sem aukin áhersla er á rannsóknir og áhrif viðburða og ferðaþjónustu á samfélög. Námið er fjarnám með staðbundnum lotum sem hægt er að taka sem fullt nám eða hlutanám.

Þú getur skoðað skipulag námsins í Uglu, kennsluvef háskólans.