Hestadagar á Hólum

Hestadagar á Hólum hafa á undanförnum árum orðið að föstum lið í samstarfi á  milli Hestafræðideildar Háskólans á Hólum og grunnskólum í Skagafirði. Í síðustu viku komu nemendur í 9. bekk á Hóla og tóku þátt í þriggja daga námskeiði þar sem þeir fengu tækifæri til að kynnast hestamennsku og starfi deildarinnar.

Á námskeiðinu fengu nemendur bæði bóklega og verklega kennslu þar sem farið var yfir helstu grunnatriði í umgengni við hesta, reiðmennsku og öryggi í kringum hestinn. Nemendur fengu þannig innsýn í það fjölbreytta starf sem tengist íslenska hestinum og hestamennsku.

Fyrir marga þátttakendur var þetta í fyrsta sinn sem þeir komust í návígi við hesta og prófuðu reiðmennsku. Nemendur tóku þátt af miklum áhuga og voru Hestadagarnir bæði lærdómsríkir og skemmtilegir fyrir alla sem tóku þátt.

Takk kærlega fyrir komuna